sábado, 10 de enero de 2009

LAS CANDELAS

LAS CANDELAS


- Vamus muchachus,
que mañana son las Candelas
y tenemus qu'avial los aperus
pa en cuantu la nochi aparesca
salil a cogel los pájarus.

- Tampocu es pa tantu hombri,
pa cubril los brocalis
con una manta o cobertón
tenemus más que de sobra,
en las noras no miramus,
es en los pozus qu'están encañaus
ondi más se queán.

- Tamíen mos falta un carburu
o una güena linterna,
hay que buscal un palu largu
y jacel una manga con tela metálica,
y en cuantitu qu'oscuresca
empezamus con la manga
que los pájarus se metin enseguía
po los buracus de las tapias
y aluegu mos vamus a los pozus
jasta qu'enllenemus la cesta.

- Y digu yo, p'aque los cogemus,
pobrecillus estarán sufriendu,
apretujáus metíus en una cesta
p'aluegu soltalus mañana en L'iglesia,
que sentíu pué tenel esu.

- No me vengas 'hora con cuentus,
siempri s'hajechu asín
y a ningún quintu sé l'a ocurríu
preguntal semejanti cosa,
y además quién íba a sabelu,
son tradicionis que no'stan escritas,
y sabi Dios dende que tiempus
se vienin jaciendu,
igual naidi s'acuerda ya d'ellu.

- Peru no'stá mal sabel
porque s'hacin las cosas,
no hay na malu en sabelu.

- Apropósitu, mira Duardu
porallí vieni el Agüelu,
anda y pregúntale,
comu el no lo sepa
qu'es el que más le gusta
indagal las cosas
muchu me temu
que nunca llegarás a sebelu.

- Agüelu, venga usté p'acá,
a vel sí usté lo sabi
y mos lo pué contal.

- Qu'es lo que queríis sabel,
pos tó lo que yo sé
quieru que los demás
lo sepan tamíen.

- Esti qu'es mú curiosu y dici
que porqué hay que soltal
los pájarus en L'iglesia
el día las candelas.

- Miral muchachus
y perdonal po lo de muchachus,
yo siempri lo he vistu asín
y del porqué s'haci
la verdá es que no m'acuerdu,
tampocu m'he paráu a pensalu,
peru 'hora que lo mentáis
quicías averigual algu se puéa,
solu es una posibiliá
peru m'habéis dáu una idea.

Mañana se celebra y representa
la ceremonia de la presentación
del niñu Jesús en el templu,
entri judíus era costumbri jacelu,
pos bien nusotrus a esa fiesta
la llamamus Las Candelas,
candela comu sab'is es lumbri,
fuegu, velas y cosas d'esas,
y aquí que digamus tó esu
brilla pol su ausencia,
en cambiu se sueltan pájarus,
pardalis pol más señas,
qu'es lo que más abunda
porestas tierras,
peru poían sel palomas, tórtolas,
o comu ya es cuasi San Blas

tamíen poían sel cigüeñas,
el casu es que celebramus
la presentación en el templu,
pos bien en esi templu
pué estal la solución.

Miral,
una ves me contó un cura
qu'estuvu aquí en esti pueblu,
jaci ya muchu, muchu tiempu,
el porqué expulso Jesús
a los mercaderis del templu,
por aquél entoncis
yo no llegaba a'ntendel
que Jesús los echara a latigazu,
ni que poían estal vendiendu,
yo siempri había vistu a la genti
en L'iglesia callaína y mú quieta
y entoncis m'empezó a contal
qu'en los templus antigus
y el de Jerusalén pol más señas
no eran asina, d'esta manera
y p'aque yo lo'ntendiera
m'esplicó asín comu aquél que ici
a grosu móu
más o menus d'esta manera.

El templu era comu'na ciudá
drentu de la propia ciudá,
en su recintu,
además de sacerdotis
o comu se llamaran
por entoncis los qu'oficiaban,
no m'acuerdu exastamenti
comu me iju que se llamaban
habitaban mucha más genti
cá unu en diferentis tareas o faenas,
velandu po las ceremonias
y el güen funcionamiento,
había un mercáu
ondi se compraban los animalis
qu'aluegu s'ofrecían o sacrificaban,
además de tóas aquellas otras cosas
necesarias pa'l cultu,
quicías los mercaderis
abusarun más de la cuenta
o se dedicarun a otrus asuntus
que no eran de su competencia,
esu explicaría d'algún móu
que cuandu llegó Jesucristu
y vio lo qu'allí estaba pasandu,
que se pensaba más
en'l dineru qu'en los rezus,
arrojara a los mercaderis

a latigazu limpiu diciendu.
" Mi casa es casa d'oración
y no una cueva de ladronis."

Su ira jue contra los mercaderis
que no cumplían
con lo qu'estaba mandáu,
másomenus asín me lo explicó
o asín yo púi entendelu.

Peru vamus a lo que vamus,
si en'l templu se vendían
animalis pa sacrificius u ofrendas,
me paéci recordal
que San José y la Virgin
comprarun unus pichonis
cuandu juerun con'l niñu
a presentalu al templu,
tal ves nusotrus jagamus lo mesmu,
esus pájarus que vais a cogel
los presentamus comu ofrenda
y aluegu los soltamus sin sacrificálus
porque ya no s'hacin sacrificius,
Cristu se sacrificó pol nusotrus
pa salvalnus y redimilnus.

Y ésta es la'splicación
qu'os pué dal mi cortu conocimientu,
de tós modus, il po los pájarus,
soltálus y seguil con la tradición
no la dejéis jovenzuelus.

- Vaya usté con Dios,
no se pr'ocupi.
Gracias Agüelu.

No hay comentarios: