EL LAUDETUS

IN MEMORIAN
Feliciximo Montero
Cura párroco de Villa del Campo

"Laudetus Iesus Christus"
S´oyi por'l altavos del campanariu, conestas palabras que más bien puén paécel mágicas s'anticipa el señol cura al'alba, rompiendu asín, d'esta manera el silenciu que reina en las frías madrugas d'inviernu.
Esti güen hombri de costumbris un tantu añejas, y a'nque mu pocu amigu de las modas, a'ncontráu la forma de que poámus oílu sin tenel que dil a L'iglesia.
A estas horas las callis están desiertas una capa de carámbanu cubri tó los charcus, tó es mú hostil, tó esta heláu, peru el sabi mú bien que sí rompi o desasí la placa de jielu, debaju hay agua, al igual qu'hay fe enesus corazonis dormíus qu'a esta hora se despiertan o desperezan, el sabi qu'ahora mos coji a tós en casa, que cá cual anda más qu'atareáu en lo suyu, iniciando la nueva jorná, poresu no mos pué llamal a L'iglesia y mos invita a que l'oyamus cá unu dende su propia casa, mientras faenamus, o sin apenas levantalmus de la cama.
Es algu asín com'una potenti vos que llega dend'el mesmísimu cielu, colandusi tóa, ella porentri las paredis, ventanas, tejas o rendijas de la puerta.
Sin perdel ni una míaja de tiempu, mientras cá cual se levanta, se lava, s'afeita o arregla, jaci lumbri y cafés pa calental el cuerpu, el mos calienta el espíritu y mos va abriendu los ojus d'elalma.
Mientras s'hacin los preparativus, s'había el ganáu, o se disponi el jatu y los aperus, el mos prepara p'afrontal el día con más ilusión y ganas.
Peru no lo jaci comu en'l sermón que cá día cuenta lo que toca, sino acercándusi a los ploblemas de cá unu, bajandu al'arena comu se sueli ecil en'l argos de los torerus, retratandu en'l airi con certeza jasta lo más oscuru de los pensamientus.
Unu a unu, antis o dispués pué velsi reflejáu en lo que cuenta, con nuestras virtudis y defestus, con nuestras alegrías y nuestras penas, en la dicha o'n la miseria.
Esta mañana mos cuenta comu ejemplu o parábola, comu a el le gusta ecil, no la d'el hiju prodigu o la d'el sembraöl qu'esas ya mos la sabemus, sino una nueva, algu diferenti, algu que poémus sentil, tocal y comprobal y qu'el llama la cuerda.

Cá unu de nusotrus dici, tenemus un jilu o una jebra, porella tenemus que llegal al cielu, el caminu es largu y mú tortuosu y a vecis los nuestrus pecáus son muchus y pesan más de la cuenta, nuestru jilu qu'es nuestra fe y voluntas, pué sel mú débil y se mos troncha, mesmamenti poresu, nesecitamus algu en que apoyalmus, algu que mos de ánimus y ayúi a subil la cuesta.
Una cuerda la forman muchus jilus o jebras, mú delgaínas y mú chiquitejas, peru tóas juntas, colocas y bien puestas son capacis de soportal cualquiel pesu que les venga.
Ná más gratu a los ojus de Dios que vel a un pueblu que permaneci uníu y que uníu reza.
Ná se le podrá negal, a un pueblu que uníu trabaja y uníu piensa.
Ná más sencillu que jacel esa cuerda, basta con amal, ayúal y perdonal.
Asín es esti vieju cura que con'l Laudetus mos despierta.
Y asín sentáus a la lumbri o atareáus en nuestras faenas, el señol cura mos va desgranandu su verbu, se van acercandu las claras del día, se va acabandu el Laudetus.

Ahora hay que dil a la tarea y ponel en marcha su ejemplu, perdonandu al enemigu y ayúandu al compañeru.