EL MISERERE

EL MISERERE

Habla más claru, no tes'entiendi ná,
paécis el cura cuandu canta el misereri,
se solía ecil cuandu algui'n sé zarabateaba,
¿ peru qu'era en sí el misereri ?

A vecis, cerrandu una mijina los ojus,
me paéci comu poél alcanzal
la deposición d'un hechu
qu'envolvía a tó'l lugal.................

Porentri ventanas, puertas y tejas,
s'adentra el tañíu d'elesquilón
que rompi la nochi taciturna,
recordandu cual sublimi pregón
qu'es viernis de cuaresma.

Pocu a pocu, se van poblandu
las oscuras callejuelas,
pocu a pocu, sé va'scuchandu
el murmullu que s'acerca,
ávidus o perezosus pasus,
sigún de quién provengan,
vienin acariciandu o machacandu
las destartalas piedras,
tós s'encaminan pa'l Cristu
ondi el misereri se celebra.

Pa tós es un gran regociju,
a'nque cá cual lo vivi a su manera,
unus vienin pol devoción y cultu,
otrus pol vel que se tercia.

Escondíus en las esquinas
los muchachus, asustan a las mozuelas,
las mujeris bajan con sillas,
cojinis o banquetas,
qu'está el suelu mú fríu
y no hay quién arroíllalsi puéa,
apurandu el chatu jasta'l
mesmísimu culillu,
los hombris abandonan la taberna,
tós llegan al calvariu
peru no tós al Cristu entran,
de cháchara entri las crucis
son muchus los que sé quéan,
contandu aventuras y conquistas
que quicías nunca jicieran,
esti es su misereri,
no los sermonis o cánticus
qu'el señol cura jacel puéa,
de los que la reja cruzan
o'l lumbral penetran,
unus subin a la tribuna,
ondi los inquietus muchachus
porentri los barrotis de la barandilla
sus masacrás pierninas cuelgan,
otrus qu'apenas si atención prestan,
qu'están aquí más bien pa que los vean,
no llegan, a traspasal la puerta
y en el portal sobri los poyus se queán,
dejándulu cuasi vacíu en el mediu
y al prencipiu y final lo'nllenan.

Ya drentu la'rmita,
dende lo más altu del púlpitu
el señol cura el sermón prencipia,
tós escuchan mú atentus
sin perdel detalli de lo qu'allí s'esplica,
(estu s'observa mú requetebién,
sentáu en las escalerillas,
pol debaju del púlpitu
ondi el cura predica).

Un viernis trasotru, cómu cá añu,
va desgranandu su platica
de la mejol de las maneras
pá que tós entendelu puéan,
compagina parábolas con Evangelius,
milagrus o sucesus, igual da
que sean del Antigu o Nuevu Testamentu,
el güen pastol, las böas de Caná,
la pesca, el hiju prodigu, los talentus,
la multiplicación de panis y pecis,
el sermón de la montaña, el centurión,
Sodoma y Gomorra, las dies vírginis,
el diluviu, la viña, los hijus de Jacob
qu'enlazaba ma'jalanti
con los sueñus del Faraón.

Cualquiera d'estus temas
o algotrus d'esta índoli
que me s'haya podíu olviál,
tíe cabía en el misereri
y en cualquiel momentu los pué tocal.

Aluegu, poniéndusi la capa pluvial
correspondienti a los solemnis actus,
de röillas anti la imagin bendita
del Santísimo Cristu de los Desamparáus
el misereri comienza a cantal........

Asín era el misereri, a'nque naidi
o mú pocus de los qu'allí había
entendían lo que cantaba
o sabían de veras en que consistía,
ni el más pintáu había oíu hablal
d'untal San Jerónimu
y muchúsimu menus de la vulgata,
lo d'el Conciliu de Trentu
pué qu'algunu le sonara,
a pesal de qu'era antiquisimu,
d'allá polos tiempus en que reino Carolv,
aun asín y tó, pué que le sonara,
a'nque juera tan solu porqu'en las böas
de poraquel entoncis, el cura
cómu parti del ritual lo formulaba.
"Queréis contrael matrimuniu
con palabras de presenti,
cómu lo manda la Santa Madri Iglesia
y el Conciliu de Trentu lo disponi,"
peru naidi había explicáu,
ni dáu a'ntendel tan siquiera,
qu'aquellu que se cantaba
era el Salmu númeru cincuenta
y que se llama asín
porqu'asín comienza
y qu'en'l sé pidi a Dios piedas
pol malis y miserias.

Acabáu el cánticu cá unu
se güelvi pá su casa,
'hora viendu dend'el Cristu
comu la genti se marcha,
el pueblu es com'un gran árbol
por'l que trepan jormiguitas
que saliendu dend'abaju
por'l troncu s'esparraman
jasta llegal a las ramas.

Peru no tó las jormiguitas
llegan prestu a su morá,
las más jóvenis y enamorás
s'enrréan po los rinconis
comu si en'llus hubiera zarzas,
es el momentu esperáu
d'apacigüal la ses qu'abrasa
su fogosidas desmedía,
d'algún achuchón inesperáu,
d'alguna caricia furtiva,
d'algún qu'otru besu cuasi robáu,
estu es pá ellus el misereri
no lo qu'el cura ha cantáu.

Y asín el misereri s'acaba,
el silenciu tóitu lo invadi,
la nochi se cierra en tablas,
jasta'l viernis que vieni
s'acabó lo que se daba.